Admin
پرائیویٹ اسکولز کو درپیش مسائل کو حل کرنا ہماری اولین ترجیح ہے، سید نوید علی شاہ
ٹنڈوالہ یار (نمائندہ خصوصی)
آل پرائیویٹ اسکولز مینجمنٹ ایسوسی ایشن ضلع ٹنڈوالہ یار کے زیر اہتمام نئے آنے والے ڈائریکٹر پرائیویٹ اسکولز حیدرآباد ریجن سید نوید علی شاہ کے اعزاز میں پروقار تقریب منعقد کی گئی جس میں اپسما حیدرآباد ریجن کے صدر اقبال احمد عباسی، اپسما تعلقہ لطیف آباد کے صدر کشف احمد خان، اپسما میرپور خاص ریجن کے صدر فیصل خان زئی، ڈائریکٹوریٹ پرائیویٹ اسکولز حیدرآباد ریجن کی جانب سے محمد صدیق کوریجو اور عادل نظامانی نے خصوصی شرکت کی۔ اپسما ضلع ٹنڈوالہ یار کے صدر محمد عامر خانزادہ نے تمام معزز مہمانان گرامی کو خوش آمدید کہتے ہوئے اس عزم کا اظہار کیا کہ پرائیویٹ اسکولز جس طرح محدود وسائل میں معیاری تعلیم مہیا کر رہے ہیں وہ قابل ستائش ہے حکومت وقت اور وزیر تعلیم پرائیویٹ اسکولز کی خدمات کو سرہاتے ہوئے ان کے ساتھ مکمل تعاون فرمائیں جبکہ تقریب کے مہمانِ خصوصی ڈائریکٹر پرائیویٹ اسکولز حیدرآباد ریجن سید نوید علی شاہ نے اپنے مکمل تعاون کا یقین دلاتے ہوئے کہا کہ پرائیویٹ اسکولز کو درپیش مسائل کو حل کرنا ہماری اولین ترجیح ہے۔ رولز کے مطابق ہر جائز مسئلہ فوری حل کیا جائے گا تمام اسکولز لیونگ سرٹیفکیٹ اور ”ب“ فارم کے بغیر کسی بھی بچے کو داخلہ نہ دیں سید نوید شاہ نے اپسما ضلع ٹنڈوالہ یار کا شکریہ ادا کرتے ہوٸے کہا کہ پرائیویٹ اسکولز کی خدمات کسی سے پوشیدہ نہیں ان کا معیار تعلیم بہتر سے بہتر ہو رہا ہے بعد ازاں سید نوید شاہ نے ٹنڈوالہ یار کے تقریباً 23 اسکولز کو رینیول اور رجسٹریشن سرٹیفکیٹ بھی دیئے جبکہ اپسما ضلع ٹنڈوالہ یار کے عہدیداران اور ممبر اسکولز کے پرنسپلز نے سید نوید شاہ اور دیگر مہمانانِ گرامی کو اعزازی شیلڈ، اجرک، پھولوں کے گلدستے، کیک اور دیگر تحائف پیش کئے تقریب کے اختتام پر اپسما کے بانی چیئرمین شہید سید خالد شاہ کے لیے خصوصی دعا کی گئی اور تمام مہمانوں کے لیے ڈنر کا اہتمام کیا گیا۔
