Admin
اسلام آباد: اسپیکر قومی اسمبلی سردار ایاز صادق نے پاکستان تحریک انصاف (پی ٹی آئی) کے گرفتار ارکان کے لیے پارلیمنٹ لاجز کو سب جیل قرار دے دیا ہے۔ ذرائع کے مطابق اسپیکر قومی اسمبلی نے پی ٹی آئی کے گرفتار اراکین کی درخواست منظور کرلی اور اس سلسلے میں دستخط کیے ہیں۔
اسپیکر کے دستخط کے بعد قومی اسمبلی کے سیکرٹریٹ نے وزارت داخلہ کو اس ضمن میں مراسلہ ارسال کردیا ہے۔ پی ٹی آئی کے گرفتار رکن زین قریشی نے کہا کہ تمام 10 گرفتار ارکان اور عامر ڈوگر نے اسپیکر کو درخواست دی ہے، اور ان کی سیکیورٹی کی خاطر پارلیمنٹ لاجز کو سب جیل قرار دینے کا مطالبہ کیا گیا ہے۔
دو روز قبل، اسپیکر سردار ایاز صادق نے گرفتار اراکین قومی اسمبلی شیر افضل مروت، ملک محمد عامر ڈوگر، محمد احمد چٹھہ، مخدوم زین حسین قریشی، شیخ وقاص اکرم، زبیر خان وزیر، اویس حیدر جھکڑ، سید شاہ احد شاہ، نسیم علی شاہ، اور یوسف خان کے پروڈکشن آرڈرز جاری کیے تھے اور انہیں پارلیمنٹ کے اگلے اجلاس میں پیش کرنے کی ہدایت کی تھی۔
یہ پروڈکشن آرڈرز قومی اسمبلی کے قواعد و ضوابط 2007 کے تحت اسپیکر کی صوابدید کے مطابق جاری کیے گئے تھے۔ اس سے قبل تحریک انصاف کے وفد نے اسپیکر قومی اسمبلی سے ملاقات کی تھی جس میں بیرسٹر گوہر، داوڑ کنڈی، اور علی محمد خان شامل تھے۔ بیرسٹر گوہر نے کہا کہ گرفتار ممبران کو اسمبلی لانے کے لیے پروڈکشن آرڈرز جاری نہیں ہوئے تھے اور اس بات پر زور دیا کہ اسپیکر فوری طور پر اجلاس میں بلائیں۔
اسپیکر چیمبر میں وفاقی وزرا اسحاق ڈار، محسن نقوی، اور چیئرمین پیپلز پارٹی بلاول بھٹو زرداری نے بھی ملاقات کی تھی۔ بیرسٹر گوہر نے کہا کہ پروڈکشن آرڈر کے لیے تحریری درخواست کی ضرورت نہیں اور توقع ہے کہ جلد پروڈکشن آرڈرز جاری ہوں گے۔
