Admin
سعودی محکمہ موسمیات نے رواں سال حج کے موقع پر شدید گرمی کا الرٹ جاری کردیا ہے۔
سعودی محکمہ موسمیات کے سربراہ ایمن غلام نے عازمین حج کو خبردار کیا ہے کہ حج کا سیزن اس بار جون میں آرہا ہے جب بہت گرمی پڑتی ہے اور فضا میں نمی کا تناسب بھی بڑھ جاتا ہے جبکہ رواں سال 24 سے 29 جون تک سال کا گرم ترین وقت ہوگا۔
انہوں نے حال ہی میں ایک ورکشاپ کے بعد رواں سال گرمی کے ممکنہ اثرات کے حوالے سے اظہارِ خیال کرتے ہوئے کہا کہ متعلقہ اداروں کو موسم کی کیفیت کا پوری طرح علم ہونا چاہیے تاکہ تمام ضروری اقدامات بروقت کیے جاسکیں جبکہ عازمین حج کے کیمپوں کے اندر کھانے پینے سے متعلق انتظامی امور کا بھی جائزہ لیا گیا۔
ایمن غلام کا کہنا ہے کہ رواں سال 24 لاکھ سے زائد افراد حج کریں گے۔ شدید گرمی میں اُن کے لیے تمام ضروری انتظامات غیر معمولی توجہ چاہتے ہیں۔
انہوں نے بتایا کہ سعودی حکومت اس حوالے سے الرٹ ہے اور عازمین حج کو زیادہ سے زیادہ سہولتیں فراہم کرنے کے لیے متحرک ہے۔
واضح ریے کہ رواں سال رمضان المبارک کے دوران کم و بیش تین کروڑ افراد نے عمرہ کیا تھا۔ سعودی حکام عمرہ زائرین کی اِتنی بڑی تعداد کو دیکھتے ہوئے اندازہ لگارہے ہیں کہ اس بار عازمین حج کی تعداد 24 لاکھ سے زائد ہوگی۔
اس سال مناسک حج کی ادائیگی 14 سے 19 جون تک متوقع ہے
