Admin
منڈی بہاوالدین، ( میاں شریف زاہد )
ڈپٹی کمشنر ڈاکٹر فیصل سلیم اور ڈی پی او احمد محی الدین کی زیر صدارت 12ربیع الاول کے انتظامات کے حوالے سے ضلعی امن کمیٹی کا اجلاس منعقد ہوا۔
ڈپٹی کمشنر ڈاکٹر فیصل سلیم کا کہنا تھا کہ علمائے کرام عوام میں ہم آہنگی، محبت و اخوت اور برداشت کو فروغ دے کر امن و سلامتی کی فضا برقرار رکھنے میں اپنا کلیدی کردار ادا کریں،
منڈی بہاﺅالدین کے علمائے کرام ہمیشہ محبت اور بھائی چارے کا پیغام دیتے ہیں،یہی جذبہ ربیع الاول کے دوران بروئے کار لانے کی ضرورت ہے۔
ان کا کہنا تھا کہ تمام مکاتب فکر کے علمائے کرام مل کر اپنے اندر اتفاق ،اتحاد و بھائی چارے کی فضاءکو قائم رکھیں اور برداشت اور رواداری کی مثبت سوچ کو فروغ دیں۔ ہم سب نے مل کر ضلع کے امن کو قائم رکھنا ہے۔
ڈی پی او احمد محی الدین کا کہنا تھا کہ 12ربیع الاول کے موقع پرانتظامی امور کی عمدہ تکمیل سمیت فول پروف سیکیورٹی کے انتظامات مربوط انداز میں برقرار رکھنے کیلئے اراکین کمیٹی کی تجاویز ومشاورت کواولین ترجیح دی جائے گی۔
مختلف مکاتب فکر کے علمائے کرام اور انجمن تاجران کے نمائندوں نے بھی اپنے خیالات کا اظہار کیا اور گزارشات پیش کیں۔
ڈپٹی کمشنر اور ڈی پی او نے مسائل کے حل اور تجاویز پر عمل کی یقین دہانی کروائی ۔
علمائے کرام اور انجمن تاجران کے نمائندوں نے اپنے بھر پور تعاون کا یقین دلاتے ہوئے اس عزم کا اظہار کیا کہ ضلع میں امن و امان کو فروغ دینے کے لئے ضلعی انتظامیہ کے ساتھ باہمی کوارڈینیشن کے ذریعے مثبت سرگرمیاں جاری رکھیں گے۔
