پاکستانی نوجوان جدید ٹیکنالوجی سے ملک کے دفاع کو مزید مضبوط بنائیں: ڈاکٹر الطاف سیال
ٹنڈوجام (رپورٹ ای این آئی) سندھ زرعی یونیورسٹی ٹنڈوجام میں معرکہ حق تقریبات یوم دفاع کے سلسلے میں “آزادی کا جشن اور قربانی کا اعزاز” کے زیر عنوان انفارمیشن ٹیکنالوجی سینٹر کی زیرمیزبانی پروقار تقریب یونیورسٹی کے ڈاکٹر اے ایم شیخ آڈیٹوریم ہال میں منعقد ہوئی، جس میں اساتذہ، طلبہ و طالبات کی بڑی تعداد شریک ہوئی، تقریب سے خطاب کرتے ہوئے وائس چانسلر سندھ زرعی یونیورسٹی پروفیسر ڈاکٹر الطاف علی سیال نے کہا کہ آج کے جدید دور کے دوران جنگیں ٹینکوں اور بارود سے نہیں بلکہ سیٹلائٹ اور جدید ٹیکنالوجی کے ذریعے لڑی جاتی ہیں۔ ہماری پاک افواج اور نوجوانوں نے اس جدید ٹیکنالوجی کا استعمال کرتے ہوئے، پاکستان سے کئی گنا بڑے اور زیادہ دفاعی بجٹ رکھنے والے بھارت کو گھٹنوں کے بل بٹھا دیا، انہوں نے کہا کہ پاکستانی ماہرین، اور نوجوانوں نے یہاں سے دشمن کو کنٹرول کیااور بھارت کے بڑے حصے کو اندھیروں میں ڈبو دیا، وائس چانسلر نے مزید کہا کہ ہمارے طلبہ کو نئی جدت اور ٹیکنالوجی پر عبور حاصل کرنا ہوگا تاکہ پاکستان کی ترقی، کامیابی اور دفاع میں پاک فوج کے شانہ بشانہ کھڑے رہ سکیں۔اس موقع پر ڈائریکٹر انفارمیشن ٹیکنالوجی سینٹر ڈاکٹر میر سجاد تالپور نے اپنے خطاب میں کہا کہ طلبہ کا جوش و جذبہ اس بات کا ثبوت ہے کہ ہمارا مستقبل روشن ہے۔ آئی ٹی اور جدید ٹیکنالوجی میں مہارت حاصل کرکے ہی نوجوان دنیا میں پاکستان کا پرچم بلند کرسکتے ہیں، انہوں نے مزید کہا کہ یونیورسٹی کے طلبہ کو چاہیے کہ وہ محنت اور تحقیق کے ذریعے خود کو اس قابل بنائیں کہ ملکی دفاع اور معیشت میں عملی کردار ادا کرسکیں۔اس موقع پر طلبہ و طالبات نے نعت، قومی نغمے، تقاریر میں بھرپور حصہ لیا اور تقریبات کا کیک بھی کاٹا گیا، اس موقع پر ڈاکٹر مختیار میمن، ڈاکٹر محمد پنجل بٹ، ڈاکٹر منیزہ، ڈاکٹر کویتا، ڈاکٹر سہنی عباسی، ڈاکٹر محمد عارف مگسی اور دیگر موجود تھے، اس موقع پر تقریب کی میزبانی کے فرائض ڈاکٹر محمد یعقوب کوندھر نے انجام دئے،آخر میں تمام تقریبات میں حصہ لینے والے طلبہ و طالبات کو وائیس چانسلر ڈاکٹر الطاف سیال نے ٹرافیاں، شیلڈ اور میڈل سے نوازا۔
About the Author
