(رپورٹ ای این آئی)
کراچی میں لرزہ خیز واقعہ، سفاک باپ نے 2 کمسن بیٹیوں کو ذبح کردیا
کراچی کے اس لرزہ خیزواقعے میں سفاک باپ نے دو کمسن بیٹیوں کو ذبح کردیا ، تاہم پولیس نے ملزم گرفتار کرکے مقدمہ درج کرلیا ہے۔
تفصیلات کے مطابق کراچی کے علاقے نارتھ ناظم آباد بلاک G کوثر نیازی کالونی میں ایک افسوسناک اور لرزہ خیز واقعہ پیش آیا، جہاں ایک باپ نے اپنی ہی دو کمسن بیٹیوں کو قتل کر دیا۔
پولیس نے بتایا کہ ملزم اکبر نے اپنی 10 سالہ بیٹی زینب اور 11 سالہ بیٹی عالیہ کو بیدردی سے ذبح کر کے قتل کیا۔ .
تاہم واقعے کی اطلاع ملتے ہی پولیس نے فوری کارروائی کرتے ہوئے ملزم کو گرفتار کر لیا۔
ابتدائی تفتیش میں معلوم ہوا ہے کہ ملزم شدید مالی دباؤ اور قرضوں میں مبتلا تھا، اس پر کمیٹیوں کے واجبات تھے جنہیں وہ بیروزگاری کے باعث ادا نہیں کر پا رہا تھا۔
پولیس نے بتایا کہ گرفتار ملزم چھ بچوں کا باپ ہے، جن میں ایک بیٹا اور پانچ بیٹیاں شامل ہیں، مقتولہ زینب اور عالیہ تیسرے اور چوتھے نمبر کی بیٹیاں تھیں ، اس کی بیوی چند برس قبل بیماری کے باعث انتقال کر گئی تھی۔ ملزم اپنی دو کمسن بیٹیوں کے ساتھ اسی مکان میں رہتا تھا۔
علاقہ مکینوں کا کہا تھا کہ لڑائی جھگڑا کرنا اس کی فطرت کا حصہ تھا اور وہ اکثر محلے والوں سے بھی تنازع میں الجھا رہتا تھا۔
پولیس کی ٹیموں نے کرائم سین یونٹ اور تفتیشی افسران کے ہمراہ جائے وقوعہ کا معائنہ کیا اور شواہد اکٹھے کر لیے۔
پولیس نے ملزم کے خلاف مقدمہ درج کر کے مزید تفتیش شروع کر دی گئی ہے۔
About the Author
