(رپورٹ عمران مشتاق)ساتویں آل سندھ انٹر ڈویژن ویمن ٹگ آف وار چیمپئن شپ حیدرآباد: کراچی کی لڑکیوں نے میدان مار لیا
سندھ حکومت کے محکمہ کھیل و امورِ نوجوانان اور سندھ اولمپک ایسوسی ایشن کے زیر اہتمام حیدرآباد میں دو روزہ ساتویں آل سندھ انٹر ڈویژن ویمن ٹگ آف وار چیمپئن شپ کا حیدرآباد میں کامیاب انعقاد کیا گیا، جس میں صوبے بھر سے 6 ٹیموں نے حصہ لیا۔
ڈسٹرکٹ اسپورٹس افسر حیدرآباد مریم کیریو کے مطابق ایونٹ میں مجموعی طور پر 84 کھلاڑیوں نے شرکت کی، جن میں ہر ریجن سے 12 کھلاڑی شامل تھے۔ اس کے علاوہ 12 ٹیم آفیشلز اور 12 ٹیکنیکل آفیشلز نے بھی ایونٹ کے انعقاد میں کردار ادا کیا۔
مریم کیریو کے مطابق مقابلوں میں کراچی نےشاندار کارکردگی کے ساتھ پہلی پوزیشن حاصل کی، میرپورخاص کی ٹیم دوسری جبکہ تیسری پوزیشن حیدرآباد کے حصے میں آئی۔ شاندار کارکردگی کا مظاہرہ کرنے والی ٹیموں میں ٹرافیاں، میڈلز اور اسناد تقسیم کی گئیں۔
تقریبِ تقسیمِ انعامات کے مہمانِ خصوصی احمد علی راجپوت سیکریٹری، سندھ اولمپک ایسوسی ایشن تھے، جبکہ مہمانِ اعزاز کے طور پر مریم کیریو ڈسٹرکٹ اسپورٹس آفیسر حیدرآباد اور شہید بینظیر آباد کے ڈسٹرکٹ اسپورٹس افسر عبدالرحیم راجپوت نے خصوصی شرکت کی۔
ایونٹ کی میزبانی اور انتظامی امور کی نگرانی پرویز احمد شیخ (چیف ڈائریکٹر فزیکل ایجوکیشن) اور عائشہ ایورم (ڈائریکٹر فزیکل ایجوکیشن) نے کی، جنہوں نے ایونٹ کو کامیاب بنانے میں اہم کردار ادا کیا۔
اس موقع پرڈسٹرکٹ اسپورٹس آفیسرمریم کیریو نے کہا وومین کے لیے کھیلوں کی سرگرمیوں کا انعقاد ہماری اولین ترجیح ہے۔ ایسے مقابلے نہ صرف ان کی جسمانی فٹنس بلکہ خود اعتمادی، ٹیم ورک اور قائدانہ صلاحیتوں کے فروغ کا ذریعہ بھی بنتے ہیں۔
انہوں نے مزید کہا کہ سندھ حکومت لڑکیوں کی کھیلوں میں شرکت بڑھانے کے لیے ہر ممکن سہولت فراہم کر رہی ہے، اور اس سلسلے میں ایسے ایونٹس کا تسلسل کے ساتھ انعقاد جاری رہے گا۔
About the Author
