منڈی بہاءالدین،05اگست 2025( میاں شریف زاہد )بھارتی حکومت کی جانب سے مقبوضہ کشمیر کی آئینی حیثیت تبدیل کرنے کے چھ سال مکمل ہونے پر ملک بھر کی طرح منڈی بہاوالدین میں بھی مظلوم کشمیری عوام کے ساتھ اظہار یکجہتی کے لئے ‘یوم استحصال کشمیر’ بھر پور طریقے سے منایا گیا،اس دن کو منانے کا مقصد اقوام عالم کی توجہ جدوجہد آزادی کی طرف مبذول کرانا تھی۔کشمیری بہن بھائیوں سے اظہار یکجہتی کیلئے ضلع کونسل ہال میں ایک تقریب کا انعقاد کیا گیا۔تقریب کی صدارت ایڈیشنل ڈپٹی کمشنر جنرل وقار اکبر چیمہ نے کی۔تقریب میں اسسٹنٹ کمشنر منڈی بہاءالدین عدنان بشیر وڑائچ سمیت ضلع بھر کے سرکاری افسران نے شرکت کی۔ تقریب میں پاکستان اور کشمیری پرچم کی پرچم کشائی کی گئی اور قومی ترانے پیش کئے گئے، سائرن بجایا گیا ، دس بجے ایک منٹ کی خاموشی اختیار کی گئی اور کشمیراور پاکستان کی سلامتی کی دعا بھی کی گئی۔ایڈیشنل ڈپٹی کمشنر جنرل وقار اکبر چیمہ کا کہنا تھا کہ اس دن کو منانے کا مقصد اقوام عالم کی توجہ جدوجہد آزادی کی طرف مبذول کرانا ہے ، بھارت نے آج کے دن چھ سال پہلے 5 اگست 2019 کو کشمیر کی آئینی حیثیت تبدیل کر کے کشمیریوں کا استحصال کیا۔ پاکستانی قوم عالمی برادری کو جگانے کیلئے وزیر اعظم محمد شہباز شریف اور وزیراعلیٰ پنجاب مریم نوازشریف کی قیادت میں یوم استحصال کشمیر بھرپور طریقے سے منا رہی ہے۔ان کا کہنا تھا کہ کشمیر کے عوام کو پیغام دینا چاہتے ہیں کہ وہ اپنی جدوجہد آزادی میں تنہا نہیں بلکہ پوری پاکستانی قوم ان کے شانہ بشانہ کھڑی ہے۔ تقریب کے اختتام پر مظلوم کشمیری بہن بھائیوں سے اظہار یکجہتی کیلئے آگاہی ریلی کا انعقاد کیا گیا، جو ضلع کونسل سے شروع ہو کر ڈی سی آفس کے گیٹ پر اختتام پذیر ہوئی۔
About the Author
