اسلام آباد: خواندگی کے عالمی دن کے موقع پر وزیراعظم محمد شہباز شریف نے ایک اہم پیغام جاری کیا ہے جس میں انہوں نے خواندگی کو بنیادی انسانی اور آئینی حق قرار دیا اور تعلیمی ایمرجنسی نافذ کرنے کا اعلان کیا ہے۔
وزیراعظم نے کہا کہ خواندگی محض پڑھنے لکھنے کی صلاحیت نہیں بلکہ یہ معاشرتی بااختیاری، اقتصادی مواقع، اور فعال شرکت کا دروازہ ہے۔ انہوں نے اپنے عزم کا اظہار کرتے ہوئے کہا کہ آج ہم تعلیم کے ایجنڈے کو آگے بڑھانے کے لیے پختہ عزم رکھتے ہیں اور ایک زیادہ باخبر اور پائیدار قوم کی تعمیر کے لیے کوشاں ہیں۔
شہباز شریف نے بتایا کہ تعلیمی ایمرجنسی کے تحت ملک بھر میں طلبہ کے اندراج کی مہم شروع کی گئی ہے، اسکولوں میں بچوں کو دوپہر کا کھانا فراہم کیا جا رہا ہے، اور اسکول چھوڑنے کی شرح کو کم کرنے کے لیے وظائف اور دیگر مراعات متعارف کرائی گئی ہیں۔
انہوں نے اس بات پر زور دیا کہ ٹیکنالوجی کے مطابق خواندگی اور مہارتوں کی ترقی ناگزیر ہے، اور حکومت ایک جامع منصوبے پر عمل پیرا ہے جس کے تحت ٹیکنالوجی کو تعلیمی نظام میں ضم کیا جائے گا تاکہ نوجوانوں کو ڈیجیٹل معیشت کے لیے ضروری مہارتیں فراہم کی جا سکیں۔
وزیراعظم نے کہا کہ نجی شعبے اور سول سوسائٹی کی تنظیمیں حکومت کی کوششوں میں اہم شراکت دار ہیں، اور موثر شراکت داری کے ذریعے تعلیم کو روزگار اور خود روزگار کے مواقع سے جوڑا جائے گا، جس سے ایک مضبوط اور جامع افرادی قوت تیار کی جا سکے گی۔
انہوں نے آخر میں قوم سے اپیل کی کہ سب مل کر خواندگی اور تعلیم کو فروغ دینے کے لیے کام کریں اور اپنے بچوں اور ملک کا روشن مستقبل بنائیں۔
