اسلام آباد : وزیر اعظم محمد شہباز شریف نے ملک سے پولیو کے مکمل خاتمے کے لیے خصوصی انسداد پولیو مہم کا آغاز کر دیا ہے، جس میں 3 کروڑ بچوں کو پولیو سے بچاؤ کے قطرے پلائے جائیں گے۔
اسلام آباد میں ہونے والی تقریب میں وزیر اعظم کے کوارڈینیٹر برائے صحت ڈاکٹر مختار بھرتھ، خصوصی نمائندہ عائشہ رضا فاروق، ورلڈ ہیلتھ آرگنائزیشن، یونیسف، گیٹس فاؤنڈیشن اور اقوام متحدہ کے نمائندوں سمیت دیگر اہم شخصیات نے شرکت کی۔
تقریب سے خطاب کرتے ہوئے وزیر اعظم شہباز شریف نے بتایا کہ ملک کے 115 اضلاع میں 9 سے 15 ستمبر تک جاری رہنے والی مہم کے دوران 2 لاکھ 86 ہزار پولیو ورکرز گھر گھر جا کر پانچ سال سے کم عمر بچوں کو ویکسین فراہم کریں گے۔
انہوں نے کہا کہ پاکستان سے پولیو کے مکمل خاتمے کے لیے حکومت کے ساتھ تعاون کرنے والے بین الاقوامی اداروں اور تنظیموں کے شکرگزار ہیں اور اُمید ظاہر کی کہ حکومت اور شراکت داروں کی مشترکہ کوششیں اس موذی مرض کے خاتمے میں کامیاب ہوں گی۔
وزیر اعظم نے والدین سے درخواست کی کہ وہ اپنے بچوں کے بہتر اور محفوظ مستقبل کے لیے انسداد پولیو مہم میں بھرپور تعاون کریں اور اپنے بچوں کو تمام عمر کی معذوری سے بچانے کے لیے پولیو ویکسین ضرور پلائیں۔
About the Author
