اسلام آباد: وزارت تعلیم کی جانب سے ایوان بالا میں پیش کردہ اعدادوشمار کے مطابق ملک بھر میں 2 کروڑ 62 لاکھ 6 ہزار 520 بچے اور بچیاں اسکولوں سے باہر ہیں، جو تعلیمی بحران کی سنگین صورتحال کی عکاسی کرتا ہے۔
تفصیلات کے مطابق، 5 سے 9 سال کی عمر کے 1 کروڑ 7 لاکھ 74 ہزار 890 بچے اور بچیاں ابتدائی تعلیم سے محروم ہیں، جن میں 49 لاکھ 72 ہزار 949 بچے اور 58 لاکھ 1 ہزار 941 بچیاں شامل ہیں۔
وزارت تعلیم کے اعدادوشمار کے مطابق 10 سے 12 سال کی عمر کے 49 لاکھ 35 ہزار 484 بچے مڈل تعلیم سے محروم ہیں، جن میں 21 لاکھ 6 ہزار 672 بچے اور 28 لاکھ 28 ہزار 812 بچیاں شامل ہیں۔
ہائی اسکول کی تعلیم سے محروم طلبہ و طالبات کی تعداد 45 لاکھ 45 ہزار 537 ہے، جن میں 23 لاکھ 6 ہزار 882 طلبہ اور 22 لاکھ 38 ہزار 655 طالبات شامل ہیں۔
ہائر سیکنڈری تعلیم کے حوالے سے بھی صورتحال تشویشناک ہے، جہاں 59 لاکھ 50 ہزار 609 طلبہ و طالبات تعلیم سے محروم ہیں۔ ان میں 29 لاکھ 92 ہزار 570 طلبہ اور 29 لاکھ 58 ہزار 49 طالبات شامل ہیں۔
یہ اعدادوشمار ملک کے تعلیمی نظام میں اصلاحات کی فوری ضرورت کی جانب اشارہ کرتے ہیں۔
