گوجرانوالہ تھانہ صدر وزیر آباد کے علاقے گنیا والہ کے قریب مبینہ پولیس مقابلہ، چناب ٹول پلازہ کے قریب پنجاب اسمبلی کے اسسٹنٹ سکیورٹی آفیسرکو دوران ڈکیتی مزاحمت پر قتل کرنے والا خطرناک ڈاکواپنے ساتھیوں کی فائرنگ سے مارا گیا۔
واقعہ تھانہ صدروزیرآباد کی حدود میں پیش آیا جہاں تھانہ سوہدرہ پولیس ملزم جمشید کو برآمدگی کے لیے لے جا رہی تھی کہ ملزمان کے ساتھیوں نے پولیس پر حملہ کرکے اپنے ساتھی کو چھڑا لیا۔ پولس کے مطابق گنھیا والا کے قریب دوران ناکہ بندی ڈاکوؤں کا دوبارہ پولیس سے آمنا سامنا ہو گیا دو طرفہ فائرنگ کے تبادلہ میں خطرناک ڈاکو اپنے ہی ساتھیوں کی فائرنگ سے ہلاک ہو گیا جبکہ ملزمان کے 2 ساتھی اندھیرے کا فائدہ اٹھاتے ہوئے موقع سے فرار ہو گئے۔ واقعہ کاعلم ہوتے ہی ایس ایس پی انوسٹی گیشن رضوان طارق کی سربراہی میں ڈی ایس پی ہاشم گجر،ایس ایچ او گوہرعباس بھٹی سمیت پولیس کی بھاری نفری موقع پر پہنچ گئی۔ مقتول ڈاکوکے ساتھیوں کی تلاش کے لیے سرچ آپریشن جاری ہے پولیس کے مطابق ڈاکو کی شناخت جمشید کے نام سے ہوئی لاش اسپتال منتقل کردی گئی ہے۔ ڈی ایس پی ہاشم گجر کے مطابق اسی ڈاکونے پنجاب اسمبلی کے سکیورٹی اسسٹنٹ عمیر طارق کودوران ڈکیتی قتل کیا تھا۔ عمیرطارق 5 بہنوں کا اکلوتا بھائی تھا۔ 6 دن بعد اس کی شادی تھی جسے ڈاکونے قتل کیا تھا۔ ہلاک ڈاکو گوجرانوالہ سمیت دیگر اضلاع کی پولیس کو متعدد سنگین مقدمات میں مطلوب تھا۔
About the Author
