خوشاب ( راجہ نورالہی عاطف سے )ضلعی انتظامیہ اور محکمہ زراعت خوشاب کے زیراہتمام نمبرداران کنونشن برائے خصوصی آگا ہی مہم کاشتکاری گندم کا انعقاد فاطمہ جناح ہال میں ہوا۔ڈپٹی کمشنر سروش فاطمہ شیرازی نے کنونشن سے خطاب کرتے ہوئے کہا کہ وزیراعلیٰ پنجاب نے گندم کے کاشتکاروں کیلئے گندم اگاؤ مہم کے تحت 25 ایکڑ سے زائد رقبہ پر گندم کاشت کرنیوالوں کو بذریعہ قرعہ اندازی مفت ٹریکٹر فراہم کرنے کا اعلان کیا ہے۔انہوں نے کہاکہ شعبہ زراعت میں گندم کی فصل نہایت اہمیت کی حامل ہے ضلع کے کاشتکار بھائی زیادہ سے زیادہ رقبہ پر گندم کاشت کریں اس ضمن میں حکومت پنجاب نے کسانوں کو معاشی طور پر مستحکم بنانے کیلئے مختلف کسان پیکج متعارف کروائے ہیں ان میں کسان کارڈ،گرین ٹریکٹر اور بارہ ایکڑ سے پچیس ایکڑ تک گندم کاشت کرنیوالے کسان بھائیوں کو بذریعہ قرعہ اندازی 1ہزارمفت لیزر لینڈ لیولر اور1ہزارٹریکٹر فراہم کرنے کا اعلان کیا ہے۔ انہوں نے کنونشن میں موجود نمبرداروں اور کسانوں سے کہا کہ وہ دیگر کاشتکاروں تک یہ پیغام عام کریں کہ وہ زیادہ سے زیادہ گندم کاشت کریں اور حکومت پنجاب کے کسانوں کی معاشی خوشحالی کیلئے متعارف کرائے گئے کسان پیکج کی افادیت بارے آگاہی فراہم کریں۔ کنونشن میں اے ڈی سی(آر) خالد عباس سیال، اسسٹنٹ کمشنر عثمان غنی،ڈپٹی ڈائریکٹر زراعت توسیع عبدالماجد خان،محکمہ زراعت کے دیگر افسران اور کثیر تعداد میں نمبرداران اور کسانوں نے شرکت کی۔ڈپٹی ڈائریکٹر زراعت توسیع نے خطاب کرتے ہوئے کہا کہ محکمہ زراعت کا عملہ کاشتکاروں کی بھر پور رہنمائی کر رہا ہے،گندم کے ایکشن پلان کے مطابق کاشتکاروں کو سہولیات فراہم کی جارہی ہیں۔
