سرگودہا (رپورٹ ڈویژنل بیورو)سرگودھا وزیر اعلیٰ پنجاب مریم نواز شریف کی ہدایت پر ہونہار طالبات کی حوصلہ افزائی کے لئے ”پڑھا لکھا پنجاب پروگرام ” کے تحت محکمہ ہایئر ایجوکیشن کے زیر اہتمام گورنمنٹ ایسوسی ایٹ کالج برائے خواتین چاندنی چوک میں سائنسی ماڈلز کی نمائش کا انعقاد کیا گیا۔ جس میں چاروں اضلاع کے مختلف سرکاری کالجز کی طالبات نے اپنے فن کا مظاہرہ کرتے ہوئے سائنسی ماڈلز نمائش میں پیش کئے۔ کمشنر جہانزیب اعوان اور اے ڈی سی آر فہد محمود نے طالبات کی جانب سے لگائے گئے سائنسی ماڈلز کے آگاہی سٹالز کامعائنہ کیا، طالبات کی تخلیقی صلاحیتوں کو سراہا اور انہیں شاباش دی۔ کمشنر جہانزیب اعوان نے بہترین سائنسی ماڈلز پیش کرنے والے تین پوزیشنز میں ٹرافیاں اور تعریفی اسناد بھی پیش کیں۔ اس موقع پر ان کا کہنا کہ سائنسی ماڈلز کے تخلیقی مقابلے صلاحیتوں کی نشو ونما کیلئے انتہائی اہم ہیں سائنسی ماڈلز مقابلہ کا مقصد طلبہ کی تخلیقی صلاحیتوں کو ابھارنا اور سائنس و ٹیکنالوجی، انجینئرنگ، آرٹس و ریاضی کے فروغ کے علاوہ ان میں مذکورہ مضامین و عنوانات کے حوالے سے دلچسپی پیدا کرنا ہے۔ انہوں نے کہا کہ سائنسی ماڈلز کی نمائش میں طالبات کو ہم نصابی سرگرمیوں میں حصہ لینے کی ترغیب دینے ، ان کی تخلیقی صلاحیتوں کو مختلف شعبوں میں جدید خیالات و رجحانات کے ذریعے اجاگر کیا گیا۔اس موقع پر ڈپٹی ڈائریکٹر کالجز ابو الحسن نقوی پرنسپل پروفیسر صفیانہ سمیت طالبات اور خواتین اساتذہ کی کثیر تعداد موجود تھی.
