منڈی بہاﺅلدین،( میاں شریف زاہد ) اسسٹنٹ کمشنر منڈی بہاءالدین ندیم بلوچ کی زیرصدارت اور محکمہ بہبودآبادی کے زیر اہتمام عالمی یوم خواتین کے حوالے سے گورنمنٹ پوسٹ گریجوایٹ کالج برائے خواتین میں تقریب کا انعقاد کیا گیا۔ اس موقع پر ڈپٹی ڈائریکٹر کالجز فاروق پھپھرا، ڈسٹرکٹ پاپولیشن ویلفیئر آفیسر عتیق الرحمٰن، پرنسپل و وائس پرنسپل سمیت اساتذہ اور طالبات کی کثیر تعداد بھی موجودتھی اسسٹنٹ کمشنر ندیم بلوچ کا تقریب سے خطاب کرتے ہوئے کہنا تھا کہ پاکستانی خواتین بہتر کارکردگی کا مظاہرہ کرکے ملک و قوم کا نام روشن کر سکتی ہیں، خواتین کو بااختیار بنانے کے حوالے سے پاکستان میں اب تک ہونے والی پیش رفت شاندار ہے۔ حکومت پنجاب وزیر اعلیٰ پنجاب مریم نواز شریف کی رہنمائی میں خواتین کی سماجی و معاشی ترقی کے لئے بھرپور کوشش کر رہی ہے۔ موجودہ حکومت خواتین کی ترقی اور ان کے تمام شعبہ ہائے زندگی میں کردار کو اجاگر کرنے پر اپنی تمام توجہ اور وسائل کو مرکوز کئے ہوئے ہے اور موجودہ حکومت کے موثر اقدامات کی وجہ سے ہی معاشرے میں خواتین کو اپنی پسند کے ہر شعبے میں کام کرنے کی مکمل آزادی حاصل ہے۔ ان کا کہنا تھا کہ یہ خوشی کی بات ہے کہ پاکستانی خواتین دن بدن ہرشعبے میں قوم کا سرفخر سے بلند کررہی ہیں۔ اسسٹنٹ کمشنر کا کہنا تھا کہ خواتین کی عزت و توقیر ہمارا معاشرتی ہی نہیں بلکہ دینی فریضہ بھی ہے۔ قرآن پاک میں آج سے کئی سو سال پہلے سورة النساءکا نزول اور اسلام میں عورت کے حقوق بتا کر عورت کو وہ حقوق عطا کئے ہیں، جن کا مغربی معاشرہ آج متلاشی ہے۔ تقریب سے ڈسٹرکٹ پاپولیشن ویلفیئر آفیسر سمیت دیگر مقررین اور طالبات نے بھی اپنے خیالات کا اظہار کیا۔ تقریب کے اختتام پر طالبات کے تقاریر ی مقابلہ جات میں پوزیشن ہولڈرز اور اپنے اپنے شعبوں میں بہترین کارکردگی کا مظاہرہ کرنے والی خواتین میں شیلڈز بھی تقسیم کی گئیں۔
