حیدرآباد : جی سی یونیورسٹی حیدرآباد کے وائس چانسلر پروفیسر ڈاکٹر امجد علی آرائیں نے چیئرمین ہائر ایجوکیشن کمیشن (ایچ ای سی) اسلام آباد ڈاکٹر مختار احمد سے اہم ملاقات کی، جس میں جامعہ کے اہم امور اور تعلیمی معاملات پر گفتگو کی گئی۔
ملاقات کے دوران پروفیسر ڈاکٹر امجد علی آرائیں نے چیئرمین ایچ ای سی کو جی سی یونیورسٹی حیدرآباد میں حالیہ پیش رفت، تعلیمی معیار، انفراسٹرکچر کی بہتری، اور تحقیق کے فروغ کے لیے کیے گئے اقدامات سے آگاہ کیا۔ انہوں نے جامعہ کے اسٹریٹجک اہداف، کامیابیوں اور مستقبل کے منصوبوں پر روشنی ڈالی جن کا مقصد جامعہ کی ترقی کو فروغ دینا ہے۔
چیئرمین ایچ ای سی ڈاکٹر مختار احمد نے وائس چانسلر کی کوششوں اور عزم کو سراہا اور یونیورسٹی کے وژن کی مکمل حمایت کی یقین دہانی کرائی۔ انہوں نے اعلیٰ تعلیم کے فروغ کے لیے ایچ ای سی کی جانب سے مکمل تعاون جاری رکھنے کا وعدہ کیا۔
اس موقع پر وائس چانسلر نے ایچ ای سی اسلام آباد کی ڈائریکٹر جنرل فنانس ثمینہ درّانی سے بھی ملاقات کی، جس میں یونیورسٹی کے ترقیاتی منصوبوں سے متعلق مالی امور پر بات چیت کی گئی۔
یہ دورہ جی سی یونیورسٹی حیدرآباد کی ایچ ای سی اسلام آباد کے ساتھ مضبوط شراکت داری قائم کرنے کی کوششوں کا عکاس ہے، تاکہ جامعہ کی تعلیمی اور انتظامی صلاحیتوں کو مزید مستحکم کیا جا سکے۔
