ننکانہ صاحب (بیورورپورٹ) ڈاکٹر سجاد مبین نے بابا گورو نانک یونیورسٹی ننکانہ صاحب کے وائس چانسلر کا اضافی چارج سنبھال لیاتفصیلات کے مطابق یونیورسٹی آف اوکاڑہ کے وائس چانسلر، پروفیسر ڈاکٹر سجاد مبین نے بابا گورو نانک یونیورسٹی ننکانہ صاحب کے وائس چانسلر کا اضافی چارج سنبھال لیا۔ وہ چھ ماہ کے لیے اس عہدے پر خدمات انجام دیں گے ،چارج سنبھالنے کے بعدڈاکٹر مبین نے یونیورسٹی کو ترقی یافتہ اور خود کفیل ادارہ بنانے کے عزم کا اظہار کیا۔ انہوں نے فیکلٹی اجلاس کی صدارت کرتے ہوئے ایم فل اور ایلائیڈ سائنسز میں نئے ڈگری پروگرامز شروع کرنے کی ہدایات دیں۔طلباءسے ملاقات اور کلاس رومز کے دورے کے دوران ڈاکٹر مبین نے عوامی و نجی شراکت داری (پی پی پی) ماڈل کے تحت محفوظ اور آرام دہ ٹرانسپورٹ کی سہولت فراہم کرنے کا اظہار خیال کیا۔ اس کے علاوہ انہوں نے حال ہی میں نصب ہونے والے واٹر فلٹریشن پلانٹ کا افتتاح بھی کیا۔پروفیسر مبین نے رجسٹرارمسٹر مبشر طارق اور انجینئرنگ اسٹاف کے ہمراہ بابا گورو نانک یونیورسٹی کے زیر تکمیل کیمپس کا دورہ کیا۔ انہوں نے 107 ایکڑ کے کیمپس کی تیز رفتار اور موثر تکمیل کے لیے اہم ہدایات جاری کیں ڈاکٹر مبین کا کہنا تھا کہ یونیورسٹی آف اوکاڑہ میں نافذ کامیاب ماڈلز کو بابا گورو نانک یونیورسٹی میں بھی لاگو کر کے اسے مثالی تعلیمی ادارہ بنایا جائے گا۔ یونیورسٹی آف اوکاڑہ کے ترجمان کے مطابق، پروفیسر مبین نے اپنی تقرری کے بعد یونیورسٹی آف اوکاڑہ کو مالی طور پر خود کفیل اور پائیدار بنانے کے لیے مختلف اقدامات کیے ہیں، جن میں ویک اینڈ پروگرامز، سکل ڈویلپمیٹ کورسز، نئے ڈگری پروگرامز کا آغاز، اور صنعتی شراکت داری شامل ہیں۔ وہ اب یہی اقدامات ابا گورو نانک یونیورسٹی میں بھی لاگو کرنے کی خواہش رکھتے ہیں، جو طویل عرصے سے انفراسٹرکچرل اور انتظامی مسائل کا سامنا کر رہی ہے۔
