سرگودھا سینئر سٹیزن فاؤنڈیشن کے چیئرمین عبدالقدیر خان کا بزرگ شہریوں کی پنشن میں اضافے کا مطالبہ
سرگودھا: سینئر سٹیزن فاؤنڈیشن کے چیئرمین عبدالقدیر خان نے حکومتِ پاکستان سے مطالبہ کیا ہے کہ بزرگ شہریوں کی پنشن اور مالی معاونت میں فوری اور خاطر خواہ اضافہ کیا جائے تاکہ وہ موجودہ مہنگائی کے دور میں باعزت زندگی گزار سکیں۔
اپنے ایک بیان میں انہوں نے کہا کہ ملک بھر کے سینئر سٹیزن شدید معاشی مشکلات کا شکار ہیں۔ روزمرہ استعمال کی اشیاء، بجلی، گیس اور دیگر ضروریاتِ زندگی کی قیمتوں میں مسلسل اضافہ ہو رہا ہے جبکہ ادویات کی قیمتیں بھی عام بزرگ شہری کی پہنچ سے باہر ہوتی جا رہی ہیں۔ انہوں نے کہا کہ عمر رسیدہ افراد کو نوجوانوں کی نسبت زیادہ طبی سہولیات اور ادویات کی ضرورت ہوتی ہے، اس لیے ان کے اخراجات بھی زیادہ ہوتے ہیں۔
عبدالقدیر خان نے کہا کہ حکومت بزرگ شہریوں کی فلاح و بہبود کے لیے خصوصی اقدامات کرے، پنشن میں اضافہ کرے، سرکاری و نجی ہسپتالوں میں علاج معالجے کی بہتر سہولیات فراہم کرے اور ادویات پر خصوصی رعایت کا نظام متعارف کروائے۔
انہوں نے مزید کہا کہ سینئر سٹیزن معاشرے کا قیمتی سرمایہ ہیں جنہوں نے اپنی زندگیاں ملک و قوم کی خدمت میں گزاری ہیں۔ ان کی عزت، وقار اور ضروریات کا خیال رکھنا ریاست اور معاشرے دونوں کی ذمہ داری ہے۔ انہوں نے وفاقی اور صوبائی حکومتوں سے اپیل کی کہ بزرگ شہریوں کو مہنگائی کے اثرات سے بچانے کے لیے فوری عملی اقدامات کیے جائیں۔
