ایف ایم 101 ریڈیو پاکستان سرگودھا میں محتسب پنجاب کی عوامی خدمات اور شکایات کے ازالے کے نظام پر خصوصی پروگرام
سرگودھا: عوامی آگاہی اور شہری حقوق کے فروغ کے سلسلے میں ایف ایم 101 ریڈیو پاکستان سرگودھا کے مقبول پروگرام میں محمد الیاس گِل، ایڈوائزر محتسب پنجاب، ریجنل آفس سرگودھا نے بطور مہمان خصوصی شرکت کی۔ پروگرام کی میزبانی معروف براڈکاسٹر سبطین بلوچ نے کی۔
گفتگو کے دوران محمد الیاس گِل نے محتسب پنجاب کے ادارے کے قیام، دائرۂ اختیار، عوامی خدمات اور شکایات کے مؤثر ازالے کے نظام پر تفصیلی روشنی ڈالی۔ انہوں نے بتایا کہ محتسب پنجاب ایک خودمختار اور غیر جانبدار ادارہ ہے جو سرکاری محکموں میں بدانتظامی، ناانصافی، اختیارات کے ناجائز استعمال اور انتظامی بے ضابطگیوں کے خلاف شہریوں کو مفت اور فوری داد رسی فراہم کرتا ہے۔
پروگرام میں عوامی دلچسپی کے متعدد موضوعات زیر بحث آئے جن میں شکایت درج کروانے کا طریقۂ کار، آن لائن شکایات کا اندراج، محتسب پنجاب کے دائرۂ اختیار، شکایات کے ازالے کی مدت اور شہریوں کے لیے دستیاب سہولیات شامل تھیں۔ محمد الیاس گِل نے واضح کیا کہ شہری بغیر کسی فیس کے اپنی شکایات محتسب پنجاب کے دفاتر یا آن لائن نظام کے ذریعے درج کروا سکتے ہیں اور ان کے مسائل کے حل کے لیے ادارہ ہر ممکن اقدامات کرتا ہے۔
انہوں نے مزید کہا کہ محتسب پنجاب کا بنیادی مقصد عوام کو فوری، مؤثر اور کم خرچ انصاف کی فراہمی یقینی بنانا اور سرکاری اداروں میں شفافیت، جوابدہی اور بہتر طرزِ حکمرانی کو فروغ دینا ہے۔ انہوں نے شہریوں پر زور دیا کہ وہ اپنے قانونی اور شہری حقوق کے تحفظ کے لیے محتسب پنجاب کی خدمات سے بھرپور استفادہ کریں۔
پروگرام کے اختتام پر میزبان سبطین بلوچ نے مہمان کا شکریہ ادا کرتے ہوئے کہا کہ اس نوعیت کے آگاہی پروگرام عوام اور اداروں کے درمیان رابطے کو مضبوط بنانے اور شہریوں کو ان کے حقوق سے آگاہ کرنے میں اہم کردار ادا کرتے ہیں۔
جاری کردہ:
ایف ایم 101 ریڈیو پاکستان سرگودھا
مہمان خصوصی: محمد الیاس گِل، ایڈوائزر محتسب پنجاب، ریجنل آفس سرگودھا
میزبان: سبطین بلوچ
پروڈیوسر: جمشید قادری
ایگزیکٹو پروڈیوسر: فریحہ کنول
فیس بک سپورٹ: نعمان شفیق
اسٹوڈیو انجینئر: ذیشان افضل
