سرگودھا شہدائے کربلا کی قربانی پوری انسانیت کے لیے مشعلِ راہ ہے

سرگودھا(رپورٹ بیورو)سرگودھا شہدائے کربلا کی قربانی پوری انسانیت کے لیے مشعلِ راہ ہے۔ امام حسینؓ نے میدانِ کربلا میں اپنے اہلِ خانہ اور رفقا کی عظیم قربانیاں پیش کرکے ہمیں باوقار زندگی گزارنے اور کلمۂ حق بلند کرنے کا سلیقہ سکھایا۔ امامِ حسینؓ نے جو قربانی دی، وہ تا حشر زندہ رہے گی۔ان خیالات کا اظہار ممبر سنٹرل کمیٹی وفاقی ٹیکس محتسب چوہدری خالد اقبال مسرت کی رہائش گاہ پر منعقدہ شہدائے کربلا کانفرنس سے خطاب کرتے ہوئے مقررین نے کیا۔ کانفرنس میں عدلیہ انتظامیہ وکلا تاجروں اور معززینِ علاقہ نے کثیر تعداد میں شرکت کی۔مقررین میں ڈاکٹر سید حسین گیلانی سابق وفاقی سیکرٹری کابینہ فضل عباس میکن ڈی جی کسٹمز علی رضا ہنجرا سابق وفاقی سیکرٹری ہیلتھ محمد اسلم کمبوہ ذوالفقار علی کھرل کمشنر سوشل سکیورٹی چوہدری خالد اقبال مسرت،عبید اللہ سیال سابق ڈپٹی کمشنر عمران صفدر لک ایڈیشنل سیشن جج ملک شاکر بشیر اعوان ممبر قومی اسمبلی وقار منصور بریار ایڈیشنل سیشن جج منیب سلطان چیمہ سابق صوبائی وزیر ڈاکٹر پروفیسر فیروز الدین ساہ، محمد جنید مدنی اور دیگر شامل تھے۔انہوں نے اپنے خطابات میں کہا کہ شہدائے کربلا کے لہو سے اسلام کی آبیاری ہوئی۔ نواسۂ رسول ﷺ نے سر دے کر ہمیں سر اُٹھا کر چلنے کا حوصلہ اور حق و صداقت پر قائم رہنے کا درس دیا۔ مقررین نے کہا کہ شہدائے کربلا کے نقشِ قدم پر چلنے والے دنیا کے کسی جابر کے سامنے سر نہیں جھکا سکتے۔کانفرنس میں پروفیسر اطہر نوید، محمد جمشید قادر محمد عصمت اللہ عطاری، محمد فرخ سیال اور مظہر گوندل نے اپنے اپنے انداز میں شہدائے کربلا کی بارگاہ میں ہدیۂ عقیدت پیش کیا۔