گجرات (شاہد بیگ سے)روپیری قتل کیس ٹریس، اندھے قتل کا معمہ دو روز میں حل، سگا بڑا بھائی ہی قاتل نکلا
دریکڑی موٹروے پل کے قریب نوجوان سفیان کے قتل کا ڈراپ سین، پولیس نے سی سی ٹی وی کی مدد سے ملزم بلاول کو گرفتار کر لیا، ذرائع کے مطابق ملزم کا اعترافِ جرم
روپیری تھانہ ککرالی علاقے میں پیش آنے والے اندھے قتل کے افسوسناک واقعے کا پولیس نے دو روز کے اندر سراغ لگا کر اہم پیش رفت حاصل کر لی۔ ابتدائی طور پر قتل کے محرکات اور ملزمان کے بارے میں کوئی واضح معلومات سامنے نہیں آئی تھیں، تاہم پولیس نے مختلف پہلوؤں پر تفتیش کرتے ہوئے سی سی ٹی وی فوٹیج کی مدد سے مقتول کے سگے بڑے بھائی بلاول کو گرفتار کر لیا۔
ذرائع کے مطابق سفیان ولد خالد، قوم جٹ، ساکن روپیری، تھانہ ککرالی، عمر تقریباً 24 سال، کو رات گئے دریکڑی موٹروے پل کے قریب نامعلوم افراد نے تیز دھار آلے سے گلا کاٹ کر قتل کر دیا تھا۔ واقعے کی اطلاع ملتے ہی پولیس اور دیگر متعلقہ ٹیمیں جائے وقوعہ پر پہنچ گئیں اور شواہد اکٹھے کرکے تحقیقات کا آغاز کر دیا۔
سعودی عرب سے واپسی، بھائی کو گجرات سے لینے کے لیے بلایا
ذرائع کے مطابق مقتول کا بڑا بھائی بلاول سعودی عرب سے خفیہ طور پر واپس آیا تھا۔ اس نے اپنے چھوٹے بھائی سفیان سے رابطہ کرکے کہا کہ وہ اسے گجرات سے لینے آ جائے، تاہم اس نے تاکید کی کہ اس کی واپسی کے بارے میں کسی کو نہ بتایا جائے۔
بتایا جاتا ہے کہ سفیان اپنے بڑے بھائی کو لینے کے لیے گجرات گیا۔ اسے کیا معلوم تھا کہ جس بھائی کو وہ خوشی خوشی لینے جا رہا ہے، اسی کے ہاتھوں اس کی زندگی کا چراغ گل ہو جائے گا۔ واپسی کے دوران دریکڑی کے قریب مبینہ طور پر تیز دھار آلے سے اس کا گلا کاٹ کر اسے قتل کر دیا گیا۔
خود گھر والوں کو فون کرکے بھائی کی تدفین روکنے کا کہا
ذرائع کے مطابق واقعے کے بعد ملزم نے خود گھر والوں سے رابطہ کرکے کہا کہ اس کے واپس آنے تک سفیان کو دفن نہ کیا جائے۔ اس طرزِ عمل نے واقعے کو مزید پراسرار بنا دیا، تاہم پولیس نے تفتیش جاری رکھی اور بالآخر سی سی ٹی وی فوٹیج سمیت دیگر شواہد کی مدد سے ملزم تک رسائی حاصل کر لی۔
پولیس کی دو روز میں اہم کامیابی
پولیس نے مختصر وقت میں اندھے قتل کا سراغ لگاتے ہوئے مقتول کے سگے بڑے بھائی بلاول کو گرفتار کر لیا۔ ذرائع کے مطابق ملزم نے دورانِ تفتیش اپنے جرم کا اعتراف بھی کر لیا ہے۔ تاہم قتل کی اصل وجہ اور دیگر تفصیلات کی حتمی تصدیق متعلقہ پولیس حکام کی جانب سے سامنے آنا باقی ہے۔
اس افسوسناک واقعے نے اہلِ علاقہ کو غم زدہ کر دیا ہے۔ ایک ایسا نوجوان جو اپنے بڑے بھائی کو لینے کے لیے گھر سے نکلا، راستے ہی میں زندگی سے محروم کر دیا گیا۔ رشتوں کے تقدس کو پامال کرنے والے اس واقعے نے کئی سوالات کھڑے کر دیے ہیں۔
